فعلا حاجه تضحك

هاقولكم على موقف مضحك جدا بالنسبالكم بس هو كان مشكله بالنسبالى 

مشكله خطيره و كانت بتقلقنى .... عارفين لما تيجوا عايزين تروحوا شغلكم الصبح و تروحوا الموقف تلاقوا زحمه رهيبه بحيث انك مش عارف تعمل ايه تروح البيت و مش مهم الشغل و لا تحارب مع اللى بيحاربوا عشان تلحق تركب و توصل للشغل فى الميعاد

طبعا انا مكنتش بروح البيت و لا بحارب مع اللى بيحاربوا انا كنت بمنتهى البساطه بافضل واقفه لحد مالاقى ميكروباص او اتوبيس وقفوا قدامى و فى امل انى الحق اركب قبل ماتفعص فى الزحمه

بس كان فيه مشكله جامده انى كتير كان كل اللى باحصل عليه اتوبيس يقف قدامى و انا بمنتهى الفخر بركب فيه فرحانه ان محدش اتزنق فيا و لا اتبهدلت فى الركوب و فى الأخر بعد ماركب الاقى نفسى لقيت مكان كويس اقف فيه لحد ماوصل للشغل 

كل ده حلو اوى و انا راضيه بيه ادام واقفه باحترامى و مفيش تزنيق بس عارفين انا مشكلتى اخطر من كده بكتيييييييييير

انا مكنتش بعرف اقف فى اى مواصله يعنى اى فرمله او اى هزة الاقى نفسى وقعت على اللى قدامى او ورايا و اللى هما اكيد فى اغلب الاوقات رجاله .... عارفه ان ده كلام مش معقول ان عندى 25 سنة و مش عارفه اقف فى اتوبيس

متستغربوش انا عمرى ماكنت باقف الا السنة دى و ده عشان زحمه طلبة الجامعه و هذا من فضل ربى 

المهم انى اخيرا فى الفتره الاخيره عرفت ان عشان اقف فى اتوبيس و لا اقع و لا يحصل كده تانى انى لازم بمنتهى البساطه افتح بين رجلى و انا واقفه عشان يحصل اتزان

هههههههههههههه الحل طلع ابسط مما اتصور كل اللى بيحصل ليا كان بسبب انى واقفه و رجلى الاتنين جنب بعض و ده كان سبب بهدلتى

بس بعد ما عرفت سر الوقفه الصح بقيت متفائله انى لما اركب اتوبيس بعد كده مش هيحصل ليا اللى حصلى قبل كده

بس يارب يطلع ده فعلا السر لئلا للأسف هاتبهدل تانى و اقع على الناس اللى واقفين و دى حاجه لا يمكن اقبل بيها ابدا ابدا ابدا